Kətikdağ Xocalı rayonu ərazisində dağdır. Mütəq hündürlüyü 1375 m-dir. Bəzi tədqiqat­çıların fikrincə, kətikdağ toponimi qədim türk
dillərindəki “kətik” (Azər­baycan dilində “gədik”) və “dağ” sözlərinin birləş­məsi
nəticəsində yaran­mışdır. Toponim “iki dağ arası gədik” mənasındadır. Topo­nimin
adında olan kətik komponentini Qafqaz Albaniyasındakı Ketik məbədinin adı ilə
əlaqələndirən tədqiqatçılar da vardır. Orta Asiyada (Qaza­xıs­tanda və başqa
yerlərdə) da Ketik
toponiminə rast gəlmək olar. Xocalıda Kətük
(Kətik) adlı kənd də var. Kətikdağ oronimi çox güman
ki, türk dillərindəki kat sözündən əmələ gəlib. Kat – “dagın meşəsiz, gündüşən
tərəfi”, “pilləvari sıra” mənalarında işlənir. Bir çox dillərdə kat/kət komponenti həm də “qala”, “pəyə”, bina”,
“ev” və s. (Hind-Avropa, türk-monqol, fin-uqor) mənalarını verir. Kətik­­dağ
sözü ilə bağlı əfsanə də var. Xalq etimologiyasına görə, iki qardaş olan Keti
və Mehdi burada ov edərkən Mehdi maral dərisinə bürünmüş Ketini səhvən maral
bilib tüfənglə vurub öldürür. Yaxınlaşıb baxanda qardaşını vurduğunu görən
Mehdi özünü də öldürür. Guya hər iki qardaşın qəbri Kətik­dağdadır. Kəlbəcər
rayo­nundakı Ketidağ
oroqrafik obyekti də bu qəbildəndir.       Kətikdağ 1992-ci ildən 2020-ci ilə kimi Ermənistan Silahlı Qüvvələrinin işğalı altında olub. İkinci Qarabağ müharibəsinin nəticələrinə əsasən imzalanmış 10 Noyabr 2020-ci il tarixli üçtərəfli bəyanata uyğun olaraq Kətikdağ dağı Rusiya Sülhməramlı qüvvələrinin nəzarətinə keçmişdir.

Mənbə: "Müqəddəs yurd: Xocalı" kitabına və wikipedia səhifəsinə istinad edilmişdir.